Главная » 2011 » Декабрь » 31 » Геналги, "ДУМА"ги, хурмаги
22:51
Геналги, "ДУМА"ги, хурмаги
Ункъабилеб декабралда Россиялда тIоритIулел руго Пачалихъияб Думаялде депутатал ва цо-цо бакIалъулаб муниципалитеталъул нухмалъулел рищулел рищиял.

Дагъистаналда агитация гьабиялъул рахъалъ кIудияб хIаракат бахъулеб буго «Единая Россия» партиялъул вакилзабаз. Республикаялъул нухмалъулев МухIамадсалам МухIамадовасги бичIчIизабуна гIадамазда гьеб партиялъе гьаркьал кьезе кколеблъи. Дагъистаналда «Единая Россия» партиялъул сияхIалда тIоцебесеб бакIалда вуго президент МухIамадсалам МухIамадов, кIиабилеб бакIалда – Халкъияб Собраниялъул нухмалъулев МухIамадсултIан МухIамадов, лъабабилеб бакIалда - политик Рамазан ГIабдулатIипов.

Гьал къоязда магIарул районазда гIадамазулгун дандчIваял тIоритIана ГIабдулатIиповас. Унсоколо мухъалъул росабазул вакилзабазулгун гьес тIобитIараб дандеруссиналъул хIакъалъулъ гьадин бицана Генуб росулъа жамагIатчи МухIамад-наби ПатахIовас: «1971 соналдаса коммунистияб партиялда вуго дун. Жакъаги гIадатиял гIадамазул ургъел гьабун кIалъалев чи цохIо Зюганов гурони вихьуларо политиказда гьоркьов. Гьайгьай, КПРФги щвалде щвараб партия батиларо, амма ругезда гьоркьоб мадараб ккола. ГIабдулатIиповасда дица абуна: «Дуда лъала нижер район пихъидалъун хIебтIараб букIин. Хасго Генуб росу буго пихъидалъун магIишат гьабураб. ЧIикIаб ва Рихьуни ГЭСазул хIоракье ана бищун багъилал ахал. КТОялъул заманалдаги къотIана гIемерал гъутIби. Исана нижер хурма бугьана, цIорона. ТIабигIияб балагьалъ гьабураб гьеб зарал МЧСалдасан нижее бецIизабизе кIоларищ дуда?» - ян. Гьеб захIматаб суал бугилан абуна ГIабдулатIиповас, амма жинца жигар бахъилила гьеб тIубазабизе, ДРялъул президентасдаги РФялъул МЧСалъул нухмалъулесдаги цебе лъелила гьеб масъала».

Ункъабилеб декабралда тIоритIизе ругел рищиязда тIасан гьадинаб пикру загьир гьабуна Унсоколо районалдаса Шарапудин НурмухIамадовас: «Жакъа бугеб ахIвал-хIалалда рекъон, щивав чи рищиязда гIахьаллъизе ккела. ГIакъилго жинди-жиндир пикру загьир гьаби ккола рищиял. Аллагьас хъван батани, дун рищиязда гIахьаллъизе вуго, ункъабилеб декабралда гьаракь кьезе ина». Генуб росдал бегавулги вищизе вуго ункъабилеб декабралда. ГьабсагIат гьеб хъулухъалда вугев АлясагI МухIамадовасги гьесул заместитель МухIамадзагьид Жамалудиновасги лъун руго кандидатураби.

ГIабдулатIиповасулгун букIараб дандчIваялда гIахьаллъарав Рихьуниб ГЭСалъул профсоюзазул комитеталъул нухмалъулев ГIабдуллагь Батирмирзаевас абуна гьенир гIезегIан кIвар бугел масъалаби рорханилан: «ГьаракIуни росдал бегавулас бицана ГЭСалъул ралъдакье ахал арал гIадамазе кьезе кколеб компенсациялъул. Генуб росдал бегавулас абуна Заманалъулаб поселокалдаса Генубе цIакъ халатаб нух бугилан, цебего букIараб къокъаб нух цIигьабизе ресал ралагьизе кколилан. Рихьуни ГЭСалъул нухмалъулев НурмухIамад ГIалиевас рагIи кьуна гьеб нух гьабизе ва кьо базе. Дица рорхана Гендерил тоннелалъулги, кавказиязе Европаялде визаби рагьунгутIиялъулги, хIежалде ине бокьаразе хIежалъул отделалъ гьарулел квалквалазулги суалал. Гьел захIмалъаби лъугIизариялъе жинцаги бажарараб кумек гьабизе бугилан абуна ГIабдулатIиповас».

Эркенал халкъиял информациялъул алатазда ва блогазда гьоркьор лъун руго партиязул кандидатазул харжазул ва мал-мулкалъул хIакъалъулъ баянал. Бищун бечедал кандидатал кколел руго «Единая Россия» партиялъул. Россиялъул БетIераб рищиязул комиссиялъул сайталда ругел хIужабазда рекъон, «Единая Россия» партиялъул 18 кандидатасе лъагIалие щолеб хайир нусго миллион гъурщидаса тIаде унеб буго.

Автор: ГIизудинил ХIамзат ; Босараб бакI: Iакъикъат" газета
Просмотров: 447 | Добавил: gimrinec | Рейтинг: 4.0/1
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]

НАШ АДРЕС: Республика Дагестан, Унцукульский район, село Гимры, п/я 368951 * Обратная связь