Главная » 2011 » Ноябрь » 3 » «Гендериде мугъ кьун унароан цере магIарулал»
20:11
«Гендериде мугъ кьун унароан цере магIарулал»

Сафия

Микьабилеб-ичIабилеб августалъул сардилъ Унсоколо районалда чIвана анкьго чи. Гьеб лъугьа-бахъиналъ ракI пашман гьабичIев магIарулав, дагъистанияв ватиларо. Гьеб чIегIераб сордоялъ дунялалдаго машгьураб аваразул кIиго росдал гIадамазда гьоркьоб ккараб яргъилаб дандечIеялъул бицинчIеб ялъуни хъвачIеб информациялъулаб алат гIемер хутIун батиларо дуниялалда.
Гьеб кьвагьа-гIанхъиялдаса кутакалда рохун ругоан интернеталда жанир гIурус миллатчагIи, гьедин цоцаца гъурун лъугIагийин нуж, Кавказалъул чIегIераб къавмилан хъвалеб бугоан гьез. Гьеди-гьединал нилъер тушбабазул анищал тIуразарулеллъун рукIине рекъоларо нилъеда, магIарулазда. Миллатцоязда гьоркьоб ккараб гьеб пашманаб лъугьа-бахъиналде кIвар кьечIого тезе рес букIинчIо «ХIакъикъат» газеталъулги. Нижеда бичIчIула щивав чи разияб информация дунялалда тIад цохIониги гьечIолъи. ДандечIей ккараб бакIалда киналго рахъазда цIехолеб гIадат буго журналистазул. Гьедин гьабуна «ХIакъикъаталъул» хIалтIухъабазги. «Щиб дуе лъугьараб, дир магIаруллъи?» абураб макъалаялда Унсоколо росдал гIадамаз кьурал баянал рекIее гIун гьечIо гендерие. Гьебго макъалаялда Генуб росдал бегавуласул пикру кьун букIаниги, цIакъ рази гьечIого ратана генал. Газеталъул хIалтIухъаналъ (Кавсарат Сулеймановалъ) Унсоколо росулъе сапар бухьун букIана, киналго рахъазе рагIи кьураб, «Сабру – алжаналъул кIул» абураб кIудияб гьелъул макъала «ХIакъикъаталда» бахъунги букIана. Гьаб лъугьа-бахъиналдаса хадуб редакциялъул чи Генуве щун вукIинчIелъул, нижеца сапар гьабуна гьенибеги. Жакъасеб номералда кьолел руго доб сордоялъ ккараб кьвагьа-гIанхъиялда гьоркьор рукIарал Генуса гIадамазул ракIалдещвеял. Нижер мурадги, кидаго гIадин, магIарулазе рекъелги, парахалъиги, цебетIейги буго.

Райбольницаялъул кIалтIа…

ИчIабилеб августалда Генуса МухIамад Зиявудиновасда цадахъ Унсоколо районалъул больницаялда йигей гьесул хъизаналъухъе щвезе ун руго яц Сакинат ва вацгIал ГIабдулхIамидил лъади Гулжанат Загъулиева. МухIамадил машинаялда (14-абилеб моделалъул «ВАЗ») нахъисеб рахъалда гIодор чIун рукIун руго гьел, машина гулбуз бас-басизе байбихьараб мехалъ. МухIамадил лъабго сон барай яс Сапият машинаялъул цебесеб гIодочIелалда кьижун йикIун йиго. Кьвагьа-гIанхъиялъ йорчIизаюрай гьей гIодизе лъугьун йиго. Гьедин бицана, «ХIакъикъат» газеталъе баян кьолаго, Сакинатица ва Гулжанатица: «Заправкаялда ккараб кьвагьа-гIанхъиялдаса хадуб цо нухлулас райбольницаялъул кIалтIе вачун вачIана лъукъарав Шамил ИсмагIилов. Гьебмехалда чанго машина цIурал чагIи рачIана больницаялъул азбаралъуре. Гьурмазда маскабиги рукIинчIо гьезул. Азбар бахун къватIирехунги рукIана тIаде рачIаразул машинаби. Лъукъарав Шамил райбольницаялде щвезавун вуго жакъаги щивали лъаларев, гьесда ракI гурхIарав нухлулас. Больницаялде унтарав къабул гьавичIолъиялъ хIикмалъизавун вуго гьев. МухIамадида гьев шоферас абуна хирург гьечIилан жаваб кьолеб бугин больницаялъул хIалтIухъабазилан. Цинги телефоналъ хирургасухъе кIалъазехъин вукIана гьев. Гьебмехалъ тIаде рачIана машинаби цIурал яргъид гIуцIарал гIадамал. ГIемерисезухъ рукIана автоматал – цоязухъ рорхун ккун, цогидаз гьел «тIасиялде рахинарулел» рукIана, кодоб ярагъ камурав чи вихьичIо. Гьезул цоял лъукъарав Шамил вугеб машинаялда аскIоре ана, цогидал ниж рекIараб машинаялъухъе рачIана. «Мун кив вукIарав чи? Мун кив вукIарав чи?» - абун МухIамадида тIаде къазе лъугьана гьел. Машинаялда аскIов вахъун чIун вукIарав МухIамадица абуна: «ЧIужуги ячун, больницаялде вачIун вукIана», - йилан. Гьедин гьес абулаго, автоматалъул хъундагъаз кьабизе байбихьана гьесда. ТIаде рачIараз гьесде ахIулеб букIана: «Нахъе а гьаниса!» - йилан. Машинаялда жанисан чIчIичIчIи нижерги букIана: «Нахъе рилълъа, МухIамад!» - илан. Гьебмехалъ машинаялда жанив гIодов чIана гьев. НуцIа къарабго, гордухъан нахъеги кьабизе байбихьана гьесда. Машина бакизе кIул кьуризе квер бегьулев гьев вукIаго, кьвагьи бахъана, бетIер далун ана МухIамадил. Жив нахъе вачеян гьесда гьардолев вукIарав лъукъарав Шамилги чIвана тIаде рачIараз. ГIурччинал такъиябиги лъун, автоматалгун тIаде щварал гьезул цо къогогIан чи вукIана нижеда вихьулеб бакIалда. Заправкаялдаго чIварав ГъазимухIамад ГIалимирзаевасул машинаялда вачун вачIана гьев Шамил цо нухлулас больницаялде. Гьениб кьвагьа-гIанхъи байбихьидал, гьев чи нахъе ун ватана. Хадур машинаялъуса къватIире рахъиндал, хъундагъаз бухун, бихьани лъалареб хIал гьабун бугоан ИсмагIилов Шамилил гьумералъе».

«Дада! дада!» - ян гIодулей йикIана Сапият

«…Нижер чIчIичIчIиялъги кьвагьдеялъги хIинкъун йорчIизаюрай лъабго сон барай Сапият: «Дада! Дада!» - ян абун гIодулей йикIана, - ян бицана Гулжанат Загъулиевалъги Сакинат Зиявудиновалъги. - Эмен чIван хадуйги гIодулей йикIана гьей. Амма кватIичIого гьелъул гIоди къотIана, хъирхъири бахъана, речIчIараб гуллаги щун. Ясги чIван хадуб, машинаялъул нахъисеб цIер бекизе байбихьана гъоз. Цебесебги нахъисебги сидениязда гьоркьор къан, тIепун рукIана ниж. Нижер чIчIичIчIиги гIодиги рагIарал гьезда руччаби гьенир ругеблъи лъачIого рес букIинчIо. Гьедин букIаниги, гIемераб жо речIчIана нижеда. Аллагьасул хъвай гьединаб букIун, чIаго хутIанаха ниж гьеб сордоялъ. Больницаялъул кIалтIа гьеб кьвагьа-гIанхъи ккана ичIабилеб августалда сагIат кIиго тIубалеб гIадаб мехалда. Ярагъгун рачIарал гIолохъаби, азбаралде кавабиги къан, нахъе индал, больницаялде росеян гьарулеб букIана нижеца. Гулжанатида бохалда гулла щун букIана. РечIчIараб ганчIица Сакинатил гьумерги лъукъун букIана. Гьениб кьвагьа-гIанхъи байбихьидал, чирахъалги свинарун, больницаялъул нуцIби рахана. Хадуб бохги бехъерхъун Гулжанатги лъукъараб гьумергун Сакинатги, - бида рецIцIулел ниж больницаялъул кIалтIе щведал, риччачIо жанире. Нахъасан нуцIбиги рахан, жанир чIана тохтурзаби. Генуса чи къабул гьавугейилан буюрун бугин больницаялъул хIалтIухъабаздеян бицана хадуб.

Просмотров: 452 | Добавил: gimrinec | Теги: Ансадерица ч1варал генал, Сафия | Рейтинг: 1.0/1
Всего комментариев: 2
2  
Балагье магIарулал киналго нижеда тIад релълъулель руго(((

1  
мунагьал чураги киназулго

Добавлять комментарии могут только зарегистрированные пользователи.
[ Регистрация | Вход ]

НАШ АДРЕС: Республика Дагестан, Унцукульский район, село Гимры, п/я 368951 * Обратная связь