Главная » 2012 » Январь » 16 » Генубе цIидасан аскар рехана
20:21
Генубе цIидасан аскар рехана

2012 соналъул ичIабилеб январалда радал Генуб росулъ терроралда дандечIараб операциялъул (КТО) низам чIезабуна Россиялъул полициялъулаз ва аскарияз. ГьабсагIат росулъ «комендатасулаб сагIат» билълъанхъизабулеб буго, къаси микьго тIубаралдаса радал микьго тIубазегIан щивниги рокъоса къватIиве вахъине толев гьечIо. 2007-2009 соназда КТО гьабулеб заманалдаго гIадин, росда цебе бугеб майданалда чадралги чIван руго аскариял. 9-11 январалда школалде цIализе унел лъималцин риччан гьечIо рагъухъабаз.

Школа къана
Гьал къоязда росулъ лъугьа-бахъунаб бугелъул хIакъалъулъ гьадин бицана гендерил жигарав жамгIияв хIаракатчи МухIамад-наби ПатахIовас: «Къварилъиялда руго ниж. Аскарияз халгьабичIого, гали бахъизе толаро. Жакъа радал хабалалъе «Къулгьу» гьабизе унел рукIарал чагIицин чIезаруна гьез паспортазул халгьабизе. Лъеберго-кIикъогогIан росуцоясул цIар хъвараб хасаб сияхI буго гьазухъ. Ралагьулел руго МухIамад Сулеймановги цогидалги. Амма гьезул цонигияв гьанив гьечIо. Сонги хIалтIичIо школа, жакъаги риччачIо цIалдохъаби школалде. Заманалъулаб поселокалда бугеб школалъул директорги, учительзабиги, гьединго цIалдохъабиги риччачIо гьенире. МахIачхъалаялда цIалулел ругел, каникулаз эхеде рачIарал студенталги, гIемер халги гьабун, хIалихъе риччана цIалуде эхере. Рукъзабахъ чIухь балеб буго. Росулъ гIемерал постал лъун руго. Щибго гIайиб гьечIел гIолохъаби, бохдулги тIирхъизарун, къадада квералги чIвазарун чIезаруна сон. Цинги рачун ана. КъогогIан гIолохъанчи вукIана гьедин штабалде вачун ун. Гъоре щваралго, КТОялъул нухмалъулел релъанхъун руго, щибизе гьал рачаралилан. Гьеле гьедин жидее бокьа-бокьараб гьабулел руго гьанир аскариял. ХIехьон гьаб хIалги нижги ругоха, щиб гьабилебан. Операциялъул нухмалъулезул цояв Нариман Каримовас абун букIана радал анкьгоялда «комендатасулаб сагIаталъул» низам чIезабилилан. Рогьалил какалги ралел бусурбаби ругин гьанир, къватIире рахъинчIого тIураларин бичIчIизабун букIана гьесда. Амма гьесул рагъухъабаз гъобго микьгоялда гурони шуризе риччаларо. БатIи-батIиял кьеразул чадралги чIварал, кьер-кьераб ретIелги ретIарал аскарияз къайи чIван буго росда гъоркь. ГIурччинал чадразухъ чIегIераб ретIелги ретIун ругел рагъухъаби «къадировасулал» (чачаназул контрактникал) ругилан абуна. Аскарияз цебеги къайи чIван букIараб гIатIилъиялда буго дир кIудияб ах. Росдал бегавул АлясагIида цадахъ гьениве ун вукIана дун. Ункъо гIурччинаб чадир чIван батана ахикь. ЧIегIераб форма ретIараб «чачан аскар» бугоан гьениб. ФСБялъул Дагъистаналда бугеб управлениялъул нухмалъулевги вачIун вукIана гьаниве. Гьесул заместитель Юнусида дица абуна, хурма бичизе шагьаразде ниж риччазе рес букIунарищилан. БукIунилан абуна гьес. Амма риччачIо. ГIисинаб чIегIераб хурмаги буго бакIаричIого хутIун. Риччалел гьечIо ахакье, магъилъе. Гьенирги постал лъун руго. Къаси микьгоялдаса радал микьгоялде щвезегIан щивниги къватIиве ваккизего толаро. Къадги щивасул паспортазул халгьабула. Дир гьаниреги рачIун рукIана чIухь базе. Цебесеб КТОялъул заманалда (декабрь 2007 - сентябрь 2009) гIадаб зулмуни гьечIо гьаб нухалда. Цебе цIакъ пасалъи гьабун букIана, рукъзабахъ холлал рихъун, къайи–цIа минатахъ бан».

Аскарияз Генуб анцIго сон баладай?
Гендерица бицухъе, гьенире рехарал аскариязда гьоркьор руго магIарулал, лезгиял, даргиял, гIурусал, чачанал ва цогидалги миллатазул рагъухъаби. «Унсоколо районалъул нухмалъулев Жаватхан ГIабдулаевасул берда цереса рачун ана сон гъол гIолохъаби аскарияз, - абун ракIалдещвезабуна ПатахIовас - Цинги гьевги росдал бегавулги ун рукIана штабалде. КТО байбихьулелъулго росдал имам МухIамадсайгидги ана гьезухъе гара-чIвариязде, амма гъоз гьесухъ гIинбан гьечIо. ДРялъул жанисел ишазул министрасул заместитель МухIамад МухIамадовасда дица абуна жанир чадралги чIван хвезабураб ахалда щиб гьабизе бугебан. Гьелъухъ дуе компенсация кьелилан, махсаро-хочIалде сверизабун тана гьеб хабарги. Хьаргабисаги росун, лъагIелги бащдалъ цере чIарал куракул гъутIбиги рукIана гьенир. Гьанже хвечIого гьел рукIинищха. Цебесеб КТОялъул заманалдаги ах сверун къараб сеткацин тун батичIо дида гьез».

ФСБялъул вакилас абун буго, жидер мурад тIубазегIан, чадралги чIван гьанир чIезе ругилан, анцIго сон базе кканиги. Аскариязул хъизаналги рачинила гьенире. Аскариял гьенире рачIине ругилан абураб баян Генубе анкьица цебего щунги букIун буго. Балагьараб мехалда, ричIчIуларел суалал гIемер руго. Цоги гIажаибаб хIужа – Россиялъул информациялъул алатал, «кIалдибе лъим босарал гIадин», руцIцIун чIун руго. Генуб кIиабизеги КТО лъеялъул хабар бицана гIицIго «Кавказский узел» порталалъги гIурус мацIалда хIалтIулеб Грузиялъул «Пик» каналалъги. «ГIанкIу къинлъиялъулги чакма букъиялъулгицин» хъвалеб «Дагъистан» РИАялъцин, Генуб КТО лъазабун лъабабилеб къо бугониги, цо хIарп хъван гьечIоан гьелда тIасан.

Росу хъирщулеб буго
Генуб росдал бегавул АлясагI МухIамадовас гьадинаб баян кьуна: «Операция гьабулеб буго ФСБялъул нухмалъиялда гъоркь. Нариман Каримовги ккола ГРУялъул чи. Аскариязда ярагъ батичIо жеги гьаниб, боевиказул ретIел-тIех батанин абуна гьез. Росу бутIабазде бикьун буго, чIухь бан хъирщараб бутIаялдаса хъирщичIелдехун чи виччалев гьечIо. 2007-2009 соназда гIадаб квешаб хIалги гьечIо. Доб КТОялъул заманалда больницаялде унтаравцин виччалев вукIинчIо. Аскариязул вакилзабазда дица абулеб букIана, журналисталги тIаде риччалареб, закон хвезабураб тадбиргIаги гьечIищин нужер гьабилан. Риччазе ругилан рагIи кьуна гьез. ФСБялъул Дагъистаналда бугеб управлениялъул нухмалъулев вукIана гьаниве вачIун. Гьесул заместитель Юнус вуго КТОялъул бетIерлъуда гьабсагIаталда гьанив. ГIага-шагарго 1500-ниги аскарияв вуго операциялда гъорлъ гIахьаллъулев».

Автор: Хlамзат Мухlамадов;  Босараб бакl: "Хlакъикъат"  газета
Просмотров: 271 | Добавил: gimrinec | Теги: ОМОН, террор, ГИМРЫ, Генуб, Кто | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]

НАШ АДРЕС: Республика Дагестан, Унцукульский район, село Гимры, п/я 368951 * Обратная связь