Главная » 2012 » Февраль » 2 » ГIолохъабиги рухун, аскарияз росу тана
16:23
ГIолохъабиги рухун, аскарияз росу тана

2012 соналъул 9-15 январалда Россиялъул аскариязул ва полициялъулазул азаридаса цIикIкIун рагъухъанас сверун ккун букIана Унсоколо районалъул Генуб росу. 13 январалда аскарияздаги бакIалъул гIадамаздаги гьоркьоб тунка-гIуси ккана, низам цIунулез гьаваялде кьвагьизе байбихьана, ккун рачун ун, гIолохъаби рухана. Гьедин бицана гендерил гIадамаз 14 январалда росдал администрациялъул минаялда аскIоб тIобитIараб митингалда.

ЦIалдохъабазда кьабеян кинаб законалда хъван бугеб?
Кавказалъул Имарат абураб террористияблъун рикIкIунеб гIуцIиялъул Дагъистаналда бугеб вилаяталъул къади ва мугIрузулаб бутIаялъул нухмалъулев МухIамад Сулейманов (МухIамад абу ГIусман) ва гьесул рахъкколел изну гьечIого яргъид гIуцIарал ралагьизе рачIун рукIанин Генуре жалилан абуна аскарияз. Сулеймановасул эмен ГIали Сулеймановас гьадин бицана: «Рокъоре халгьабизе рачIарал аскариязда дица абуна: «Дир васасе ва гьесда цадахъ ругел цоги гIолохъабазе гIоло тIолабго росдае гIакъуба щай нужеца кьолеб? …Нуруланин абун цо лезгияв вуго гьал КТО гьабулезда гьоркьов. Гьесдаги абуна дица ракълилаб халкъалда зулму щай гьабулебан. 30-40-азаргоялдасаги цIикIкIун полициялъулав вуго Дагъистаналда, ярагъ гьечIел гIадамал щай гьез инжит гьарулел? Нужеца кьейила гъол жидехъе. «Нижедайищ гьел ругеб бакI лъалеб? – ан цIехолеб буго дица гьезда. – ГIарацги кьун, гьел ралагьизе тарал чагIи руго нуж. Ралагье нужецаго. Законалдаса бахъараб ишги гьабуге. ГIадатиял гIадамазе гIазабги кьоге». Амма гIезегIан аскарияз щибго гIайиб гьечIел цIалдохъаби, чIахIиял классазда цIалулел гIолилал малаца чIвазе байбихьана. Школлъимал рухулелъул, гьездаса ригьалъ кIудиялги гьоркьор телищха гъоз. Рахъине кIоларедухъ аскарияз цIалдохъаби рухеян кинаб законалда хъван бугеб? 13 январалда гьел цIалдохъабазда кьабулелъул, гIодобеги зодобеги речIчIизе байбихьана КТОялъулаз. Таманчаялъ кьвагьдолев вукIана гьев Нуруланги. ЦIир-цIири букIана сверухъ роржулел гулбузул».

Магжица чIварав чи вугищ?
13 январалда рузманалдаса хадуб къватIир эхетун ругел гIолохъаби цоцазул ва аскариязул суратал телефоназде рахъулел рихьидал, унел рукIарал рагъухъаби тIадруссун руго. Гьурмазда маскаби ххун рукIаниги, рекIее гIун гьечIо гьезие гьеб иш.

Хадуб ккаралъул хIакъалъулъ гьадинаб баян кьуна Генуса Шамил МухIамадовас: «Рекерухъе нахъруссун рачIана аскариял, автоматалги ритIизарун, гъоркье рачIаянги буюрулаго. ХIалгьабун рачун инехъин рукIана гIолохъаби. Гьедин гьабизе теларилан, гIадамазул руккел бакIарана. Цереккунги гьез рачун арал гIолохъаби рухун рачIана нахъе. Гьадаб къулгIадухъ буго цо гараж. Гьениве ахIун вуго КТОялъулаз дир вац. Щиб гIиллаялъе гIоло? Дагьабго мегеж бахун букIунилан. Гьаниве вачIаян ишан гьабун буго гьесде. ИнчIеб мехалда, лъабгояс ккун вачун, гаражалъув вухун вуго, къабихIал рагIабиги абун руго. Мегеж щайин тарабан гьикъидал, МухIаммад аварагасул суннат кколин кьураб жаваб рекIее гIун гьечIо къуваталъул идарабазе. ГIадамазда гьоркьове рази-ракиго аянги абун, валагьизавун вуго. ИчIабилеб классалъул цIалдохъан, гьитIинав вас яргъилъ тIерхьарал «ОМОНалъулаз», тIадеги къарукъун, къан ккун къадалъ кьабураб мехалъ, конституцияги законги тIубаялъул бицине бакI бугищ?»

«Щибаб рузманкъоялъ, сверухъ ругел росабалъа гIадамалги ракIарараб, нигIматал ва къайи-цIа ричулеб гIезегIан кIудияб базар букIуна Генуб. Цо-кIицIул кьвагьи бахъарабго гьалбал, хехго бича-хисулеб къайи-цIаги бакIарун, хIинкъуца холаго росулъа нахъе гIедегIана, - ян араб рузманкъоялъ росулъ ккара-таралъул бицана Шамилица. – Аскарияз цIакъ кIвар кьун халгьабула компьютеразул. Интернет-бухьен бугеб компьютер батани, гьеб сундуе къаригIарабилан, кинал сайтазде раккулелан цIеходула. Интернет хIалтIизабугеян хъвараб бакI бугищ Россиялъул законазда?»

Лъие рухъарал хандакъал?
Мадугьалихъ бугеб минаялъуб чIухь балеб бугинги абун, тIубараб мехелалъго къваригIелалъ хIажатханаялдецин риччачIого рукъзабахъ чIезарун руго гIадамал. Рогьалил как базеги течIого, вахъинавун чадрахъе вачун вуго цоги цIалдохъан. Гьесул телефоналда мегеж бугев вацгIаласул сурат батидал, гьав щивилан абун, вухун вуго. БотIрода таманчаги цузабун, хандакъалда жанивеги къулизавун, гьаб дуе бухъараб бугилан кIалал гьикъун руго. РечIчIараб жоялъ чIвазе вугилан тIаде гьетIарун руго.

13 январалда, КТОялъул штабалдеги рачун, ункъо гIолохъанчиясда кьабун буго (кIикъого аскарияс!). Гьеб зулму бахъараб видеоги бугилан бицана гендерица. Бищун рикIкIадаб росулъги интернет букIине кколилан Россиялъул премьер-министр Владимир Путин кIалъалев мехалда, жидеца гьелдаса пайда босизе щай бегьуларебан гьикъулеб буго гендерица. «Налогалги кьола, рищияздаги гIахьаллъула, хIалтIудеги уна, щай нижедехун пачалихъалъул гьадинаб бербалагьи бугеб? ХIукуматалъ гьабураб заралалъухъ компенсацияги кьоге, тIаса лъугьаянги абуге, чорокал рагIабаздалъун хIакъирги гьаре, - кидалъизегIан гьеб хIал чияс хIехьолеб?

Ярагъ яги цоги гIайиб чIезабизе бегьулеб жо рокъоб батичIони, хIакъирал рагIаби рехула КТОялъулаз. КТО тIобитIулеб бугеблъи росдал бегавуласда ва жамагIаталда лъазабизе тIадаб буго низам цIунулезда, гьез КТОялъул рихьизариял кьезе ккола росдал администрациялде. Нижеда гьелги берда рихьичIо», - ян бицана Шарапудин НурмухIамадовас.

Районалъул нухмалъулесул бадибчIвай
14 январалда тIобитIараб митингалдаса хадуб гендерил анцIгогIан вакил тIаде къабул гьавуна хасаб операция гьабулезул нухмалъулез. Жидерго ругел тIалабазул бицана росдал жамагIатчагIаз. ХIажи ХIажидадаевас абуна, гьаб анкьалъ аскариял сабаблъун хIалтIуде инчIого жидее ккараб зарал бецIеян, щибго гIайиб гьечIел гIолохъаби рухарал низам цIунулел тамихIалде цIайилан, мехтарал рагъухъаби гьединал операциял тIоритIизе ритIугеян, нужеца рухун лугбал рекарал гIолохъаби метериса рохьоре унилан, гьедин закон хвезабун хIалтIизе бегьуларилан. Унсоколо районалъул нухмалъулесул ишал тIуразарулев Жаватхан ГIабдулаевас гьеб дандчIваялда квешаб къимат кьуна аскариязул ишазе, щибго адаб гьечIого, жиндагицин чIухь банила гьурмазда маскаби ххурал рагъухъабаз, гIадатиял гIадамал руханила, гIорхъолъа рорчIарал гьел киналго пишабазул хIакъалъулъ жинца Дагъистаналъул президентасда лъазабизе бугилан. Гьелъие жавабалъе Дагъистаналъул жанисел ишазул министрасул заместитель МухIамад МухIамадовас абуна мун гьанив гендерида берцин вихьизе гаргадулев вугилан.

2012 соналъул январалда Генуб тIобитIараб хасаб операциялъул нухмалъулезул цояв Нариман Каримовас гендерида абуна, цебесеб нухалъ гIадин, гьечIеб гIайиб нужеде гIунтIизабизелъун, рукъзабахъе ярагъгIаги рехулеб гьечIин гьаб нухалъ жидецаян. «ХIакъикъаталъе» баян кьолаго, операциялъул нухмалъулез абуна, закон хвезабурал аскариязе тамихI гьабизе бугилан, жал гьанире гIадамазда рагъ лъазабизе рачIун гьечIилан.

КТО лъазабулеб букIин халкъалда рагIизабизе тIадаб буго
Амма, КТОялъул штабалдеги рачун, чанго рагъухъан тIаделъун хъахIиллъизегIан рухарал гендерил гIолилаз бицана, жидеда кьабулелъул, тIадеги ралагьун релъулел рукIанин офицерзабийилан. Балагьараб мехалда, журналистазе рицунел маргьаби кколел руго гIадлу хвезабурал аскариязе тамихI гьабилин абураб хабар. ГьабсагIаталда жеги Генуб росулъе лъугьунеб бакIалда аскариязул хъаравулзаби руго. Кибго чIухьги бан, гьезул аслияб техника ва гIемерисел рагъухъаби нахъе ана. Низам цIунулезухъе цониги «рохьилав» кквезе щвечIо гьаб нухалдаги.

КТОялъул хIакъалъулъ мухIканго хъван буго 2006 соналъул 26 февралалда къабул гьабураб «Терроризмалда дандечIеялъул хIакъалъулъ» абураб законалда. Гьелда бихьизабун буго КТО лъазабулеб букIин, гьелда хурхун киб ва кинал тадбирал тIоритIизе ругелали халкъиял информациялъул алатаздасан хех гьабун баян гьабизе кколилан. 2012 соналъул январалда Генуб операция тIобитIулезда гьеб законги статьяги (анцIила цоабилеб статьяялъул кIиабилеб пункт) кIочон тун рукIараб къагIида.

Автор: ГIизудинил ХIамзат; Босараб бакl: "Х1акъикъат"  газета
Просмотров: 323 | Добавил: gimrinec | Теги: Генуб, Кто | Рейтинг: 3.0/1
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]

НАШ АДРЕС: Республика Дагестан, Унцукульский район, село Гимры, п/я 368951 * Обратная связь