Главная » Статьи » МагIарул мацIалда » МагIарул мацIалда

ГІела ансал, гІела Генал какарал !!

ГІела ансал, гІела Генал какарал

Цо ручкагун кагъат нижехъеги кье

Къойил газеталда макъала хъвазе

«редакция» - букІин нужерго талихІ

     «ХІакъикъаталда» - хъван, «Ахихъан» биччан

     Ниж суризаризе хиялищ ккараб?

     Кинабгоги хІехьон гІенеккун чІедал,

     Кьижун ратилилан пикруйищ ккараб?

Нижер гІадат гьечІо гІемер ахІдолел

ГІайиб гьечІел чагІи инжит гьарулел,

Законалда гьикъун, ШаргІалде раккун

КъватІире рахъуна, ниж рахъин ккани

 

     Нуж рачІун рукІана рекъелги гьарун

     Росабазда гьоркьоб кьал ккезе гурин.

     Сабру-сабруйилан яхІ нижейги кьун

     Нухда постал лъезе щай гІедегІарал?

Нужер посталдасан кодоб ярагъгун

Кинав гІабдал унев ансал чІвалилан.

Воре нуж хІинкъуге, гІодоре риччай

Нижер пикру гьечІо нужгун рагъизе.

 

     Сон-жакъа бан гьечІо кІиябго росу

     Квешалги лъикІалги лъидаго лъала

     Дица рецциларо ниж цІакъалилан

     Жинди-жиндир тІогърокь жив-живав цІакъав.

Нижер нужедехун «жахІда» букІинчІеб

Нужер гІолохъаби гъуризе ккани

«ВухІамида» бараб дагІба букІинчІо

Гендерица гурищ вищун вук1арав?

 

     Чияр хуриб бачІун кваналеб хІайван

     Кисан бихьун гІаги хехго тІатуна

     ХІайванги нужерго, хурги нужерго

     Нужерго росулъа валагье тущман.

Гьабураб квешлъиги гендериде бан

Гаргадизе ккани гьелъул гІилла щиб?

Нижер гІолохъаби гьанже гІун ругин,

Цере чІварал щинал, лъицадай чІварал?

     Нужер росу буго кІийиге бикьун

     «НаникІабийилан» - «озденалилан»

     Адамилгун-ХІавал цохІого наслу

     БатІа гьарейилан киб хъван батараб?

Нижер гІолохъаби гьоркьор рехизе

Нужей гІоло рецІел эз щай босулеб?

Нужей гІоло жаваб эз кьезе ккани

Нужер бихьиназда яхІгойищ гьечІеб?

 

     Нуж рукІун ратани рецІел босулел

     ХІатІал къотІунилан бетІер камулищ?

     Щвара-щварал чІвазе къватІир рахъани

     ЛъикІаб хІасилалде нуж рачунаро.

ХІапдолеб гьвеялъул гьунар гІоларо

ХІапичІого хІанчІун ругъун лъикІ лъола

Гьедин сабру гьечІел чагІи ниж гуро

ХІукму Аллагьасул битІараб буго.

 

     ГъазимухІамадги Имам Шамилги

     Жеги чІаго руго халкъазда гьоркьор,

     Гьезул бахІарчилъи, гьезул ритІухълъи

     ТІолго дунялалда рагІараб буго.

Гьезул ирс босарал гІакълу камилал

ГІолохъаби руго гендерил васал!

Кодоб ярагъги ккун хІиллаги ургъун

ГІайиб гьечІев чІвазе гьел рахъунаро.

 

     Горбодаги речІчІун гьитІинаб лъимер

     ЧІвазе гьунар гІурал яхІ гьечІел васал.

     Черхалда рахъарал ругънал гІечІого

     «Жаназалда» кІанцІарал багьадурзаби.

Дунял гІаламалда цІар нужер ана

Халкъул гІаламалъго «лагІана» кьуна.

Рамазан моцІалъул лъикІаб сардида

Нужеца чІварал гьел «шагьидлъун» хвана.

 

     Нуж чІухІун ратани гІолохъаби чІван

     ГІодилел ратила нужер эбелал.

     Бергьенлъи щванилан пикру батани

     Баркула нужеда, жужахІалъул цІа.

РекІелъ чаран бугел нуж ратанани

Чаран биунеб яхІ нижелъги бугеб.

ЦІакъго яхІ бугеллъун хІалел ратани

ХІилла гендерилги цІакъ гучаб бугеб.

 

     ГІайиб гьечІел чІвазе ниж ургъиларо

     Амма гІайиб бугев чІаго теларо

     ГІадлу, законалъги гьабизе тела

     Тущманлъи росдалгун гьабизе гьечІо.

Налъи тІагІунаро би бакъваларо

Эмен-вац камурав цониги гьечІо

ГьитІинай Сафиял жаназаялъул

Гирун араб магІу кидал кІоченеб?

 

     Нужохъе устарас чІумал кьолелъул

     Автоматищ кьураб гІадамал чІвазе?

     ГІайиб гьечІел васал чІвазе унаго

     ГІурччинал тІагърал щай ботІрода лъурал?

Унго разилъанадай СагІид Афанди?

Сардил гІужалъ рахъун нуж чІвадаридал?

ЧІухІун ратиларо эл росуцоял

Росдал гІадамазе балагь бачиндал.

 

     Гьебали – добали додинан телин

     Больницалъул каву кинан рахараб

     Лъукъарал росизе изну гьечІилан

     Къабул гьарун гьечІо гьал тохтирзабаз.

Гулица рассарал, бида гІекколел

ГІолохъаби хвана кумек щвечІого

Зараз-малаз бухун ахІи баниги

Больницалъул каву кинго рагьичІо.

     Зигардилел васал, чвахулел ругънал

     Чара къосун ругел эменгун вацал

     РагьичІо каваби гьабичІо кумек

     Больницалъул кІалтІа къанщана васал.

Росдал гІадамаца магІу тІолаго

Цо къоялъ букъана щуго жаназа

Расги гІайиб гьеч1ел эменги ясги

Гулица рассана ансадерица.

     Васги гьавун вохун рокъов унаго

     Больницалъул рагьдухъ шагьидлъун хвана

     Гьавурав васасул гьумер бихьичІев

     Ясги цадахъ ячун ракьалде ана.

Генал гъурулаго тІаде вачІарав

ЧІиркъатІасев чІвана гІайибго гьечІев

Щвара-щварав чІваян цоцаде ахІун

Бидул хІорал тана заправкаялда.

     Гьебни Аллагьасул хІукму батила

     Зараялъ бищараб къадар батила

     Бихьараб хІехьезе сабруги кьеги

     Сабру тІагІаразда гъорлъе ккогеги.

Дир цо гьари буго ансадерида

Руччабазул кІалдиб кІулал райилан

ГІураб би тІун бугин гІолохъабаца

Питна бухъичІого руцІцІун рукІаян.

 

     Цоги гьари буго редакциялда

     Гурел макъалаби къватІире кьоге

     Тущманлъи лъугІизе бокьун батани

     Гендерица гІадин сабру гьабеян.

Дир гьаниб хъвазе жо гІемер букІана

ГІададисеб бицун дун кІалъаларо

ГІатІид гьабун хъвазе бокьун букІана

Бокьун гьечІо дие нуж къватІир чІвазе.

 

     Дир мурад букІана гьал гІадамазда

     РитІухъалгун тІекъал гІадамал лъазе

     ГІиллаги букІана назму бахъизе

     ГІайиб гьечІел нижер къварилъи лъазе.

 

 

 Автор лъаларо

Категория: МагIарул мацIалда | Добавил: gimrinec (28.09.2015)
Просмотров: 125 | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]

НАШ АДРЕС: Республика Дагестан, Унцукульский район, село Гимры, п/я 368951 * Обратная связь